Friday, January 4, 2013

好心抱系列~蛋卷篇


話說北角有一家好出名的蛋卷~德成號。
聽說新年既蛋卷要在農曆8月16訂。
無錯! 係岩岩過左中秋節第二日就要仆住去排隊。
結果我傍晚時分去到已經訂完新曆12月至新年既所有柯打!!!!!

WELL~
揀個短週死死地氣咁去排隊~ 
係奶奶生日果日~ 丫老公又口快快應左人地去扒地。。。
結果奶奶生日飯要押後~ 係呢個時候我諗起好似好好味又食唔到既蛋卷~
仲早過返工, 7:30 就起身。

去到排隊8:30。。。
好多人。已經排左半條街。
排多半個鐘。。。已經見唔到龍尾~~

德成記-9 時盛況〜


終於排到。。。
差不多10 時才看到龍尾,在新年前想買的人要在這月底前早些排隊了〜

講左點辛苦排。呢個只不過係前奏。
好心抱系列又點會咁簡單就過呢~

到約左奶奶食飯當日。我放了2 盒 1 磅裝的牛油及雞蛋卷係奶奶座住旁~
奶奶一坐底就望到。(無法啦~ 2盒蛋卷真係好大 SIZE 又重。

奶奶笑住問:咩黎架? 送俾我架?
老公: 係丫~ 蛋卷~ TRACY 送俾你架~ 間野好似好出名。。。
未講完奶奶即時無笑容話: 我唔食蛋卷架喎~ 你拎返去食啦~
我 O 住嘴望住老公。。。 
良久不能說話~~~
心想又乃野了~~~

席間奶奶又提起:你係咪記錯我鐘意食鳯凰卷丫?
我心諗。。。我點知你鐘意食鳯凰卷而不能接受蛋卷呢!!!
仲要你個仔都唔知。。。

結果,食完飯。送走奶奶,撘車返屋企。我老公拎住 2盒蛋卷沿途笑我。。。



Labels: ,

Sunday, December 16, 2012

好新抱系列~鮑魚篇

新年篇~

2012年新年 (年尾先寫年初事。。。無他, 因為這是一個開始)
初歸新抱⋯⋯ 雖然說奶奶不是同住也沒必要看顧,理與不理其實沒太大效果。
但她始終生左我老公,我老公亦遺傳了奶奶的基因⋯⋯
好古怪既基因~

奶奶話鐘意食鮑魚。
講真屋村出身既我,鐘意食海鮮既丫媽新年或過節都會煮鮮鮑。
即係街市可見那一種~ 清蒸真係一流~~~
而老爺(我們同老爺住而奶奶係離左婚分開住好耐)有日話樓下既藥材舖 “留” 左一包冰鮮鮑。
老爺都買應該係好野啦~
作為好新抱拿拿臨買了3包。

拎返屋企,諗住一包係屋企過節食。
老爺打個突話: 下!我話留, 無話買喎~~

拎返娘家,諗住丫媽應該鐘意,比之前鮮鮑大隻D架~
丫媽煮左係飯枱嫌棄話: 係樓上買, 二百有找, 你買幾多錢丫女? 你一定又俾人呃左啦~

拎俾奶奶,諗住佢咁鐘意食應該唔會有事掛。
奶奶知道係冰鮮鮑,好大反應高左聲線話: 吓! 急凍鮑?! 點煮架? 我只係識食罐頭同乾鮑~

哈哈哈~ 全軍覆沒~ 

IMG_4200

Labels: ,